Num Tai Lu Ai Laklai Ai Chyeju

NUM TAI LU AI LAKLAI AI CHYEJU Chyum laika: “Shingrai K.K gaw shi a hkrang bung sumla hte maren, K.K gaw shi hpe hpan da wu ai:shinggyim lasha hte shinggyim numsha hpe shi hpan da wu ai. Shaloi K.K gaw shan hpe tsun mu ai gaw, ‘ Nan kashu kasha shaprat nna mayat maya wa mu; ga ting hpe jahpring nna dai hpe up nga mu: namukdara hta rawng ai nga ni a ntsa e mung, lamu kata na ntsa malen e pyen ai u ni a ntsa e mung, ga ntsa e nsoi nsa rawng ai shamu shamawt chye ai baw mahkra a ntsa e mung a up nga mu, ngu wu ai. (N.N 1:27). “shaloi K.K gaw shi hpan hpajang da ai amu yawng hpe yu yu nna, yu mu dai gaw nachying kaja nga ai. Shaloi shana the jahpawt gaw kru ya nhtoi tai ma ai” (N.N 1:31). “Shaloi Yehowa K.K gaw aga hta nag a yun the shinggyim hkrang shachyaw wu ai rai nna, shi a ladi hta hkrung ai nsoi nsa kawut bang yaw u ai: dai rai nna shinggyim masha gaw hkrung nga ai myit masin rawng ai masha tai wa ai” (N.N 2:7). Ga Hpaw: Karai Kasang gaw shingyim masha yawng hpe hkrang bungsumla hte hpan da nna, shih pan da ai hku hkrung nga ai hpe ‘nachying kaja ai’ ngu tsun ai re. Dai majaw ‘na chying kaja ai’ ngu ai chyeju hte hpring ai masha ngu ai gaw, Karai Kasang a hkrang bung sumla a manu sari sadang, ahkang aya, atsam ningja hpring hpring hkrung nga lu ai sha n-ga, tinang a asak hkrung lam hpe Karai Kasang a chyeju hte gaw gap nga lu ai hte shani shagu Karai Kasang a hpung shingkang a matu hkrung nga lu ai masa hpe tsun ai rai nga ai. Num tai lu ai a laklai ai chyeju Nga yawng danghta hte shingdaw yang, shinggyim masha hpa baw laklai shai a ta? Hpun kawa du sat du myeng hte shingdaw yu yang, shinggyim masha hpa baw laklai shai a ta? Shinggyim masha tai lu ai lam gaw hpa chyeju ni rai a ta? Num tai lu ai gaw hpa baw chyeju laklai a ta? Chyum laika hta ‘na chying kaja ai ngu Karai Kasang tsun ai lam gaw kaning re ai lam rai ta? Num tai lu ai gaw hpa baw chyeju lak lai a ta? ga san law law rai nga ga ai. Masha gaw hpan da ai Karai Kasang hte tut nawng htinglu htinglai matut mahkai kanawn mazum nga ai hku nna sha hpan da ai a yaw shada ai lam, manu dan ai lam, chyeju hpring ai lam, laklai ai lam ni hpe chye na la lu mai ai re. Chyum laika na chyum masa hku htai yang, ‘num tai lu ai laklai ai chyeju’ hpe lawu na hku mu mada lug a ai. (1) Hkrang bung sumla hku hkrung nga lu ai chyeju Hkrang bung sumla ngu ai gaw, dazik kayet shakap ai zawn kayet shakap da hkrum nna lu madu la lu ai baw n re. Karai Kasang gaw aga hta nag a yun the shingyim hkrang shachyaw nna, shi a ladi hta hkrung ai nsa kawut bang yaw u the shinggyim masha gaw hkrung nga ai myit masin rawng ai masha tai wa ai re. Lachyum gaw shinggyim masha tai wa na matu Karai Kasang hpan da ai kaw, aga ngu ai hpan da I shingra tara (nature), Karai Kasang yaw shada shachyaw ai hkrang, Karai Kasang a nsoi n sa ni hte hkrung ai masha tai shangun ai lam re. Dai majaw Karai Kasang hte bung ai lam ngu ai shaloi, mi hte mu lu ai num la hkum hkrang n sam (Physical body) hpe tsun ai n re ( rai tim hkrang gaw K.K a hpan da ai lam hte n seng ai, wenyi lam hte n seng ai, manu n dan ai ngu ai hku gaw n re). (1) htinglu htinglai matut mahkai let sak hkrung ai lam (relational being) hte (2) Karai Kasang yaw shada da ai hku hkrang shapraw asak hkrung ai lam (Functional being) kapyawn nna hkrung nga ai lam hpe tsun ai re. Karai Kasang gaw shi nan masum rai tim langai ngu ai mahkri shawn, matut mahkai, kahkyin gumdin nga ai zawn, shinggyim masha gaw Karai Kasang hte mung, shinggyim masha shada mung, hpan da ai lam yawng hte mung ayan mahkri shawn, matut mahkai, kahkyin gumdin nga ra ai re. Karai Kasang gaw nga yawng

danghta hpe hpan da nna up hkang nga ai zawn, shinggyim masha hpe mung Karai Kasang hpan da ai kaga arai ni yawng hpe yu lahku, makawp maga, up hkang nga shangun ai re. Yesu gaw Karai Kasang yaw shada da ai lam hte maren asak hkrung nna mungkan hpe chye la ai amu bungle galaw ai zawn, shinggyim masha ni mung hpan da ai mungkan hpe makawp maga ai lam, hkang zing ai lam, hkye la ai lam ni Karai Kasang hte rau galaw na matu shatsam ai re. Dai lam ni hpe hkap la hkan sa shadik shatup ai shaloi she Karai Kasang jaw ai hkrang bung sumla a manu sari sadang, ahkang aya, atsam ningja hpring hpring hkrung nga lu ai sha n-ga, tinang a shawng lam asak hkrung lam hpe Karai Kasang a chyeju hte gaw gap nga lu ai re. Ndai gaw num la n ginhka ai yawng yawng hpe maren mara jaw da ai chyeju re. Shinggyim masha gaw num mung, la mung shingra maka hta hkan nna prat pra tim, shinggyim hkum hkrang mung Karai Kasang a lata amu ga yun hpe la nna, yaw shada lam hte hkrang shachyaw ai zawn, masha hta rawng ai nsoi nsa mung Karai Kasang kaw na re. Dai majaw Karai Kasang a man e hkum hkrang myit masin, n soi nsa yawng gaw manu dan ai. Dai manu dan ai lam hpe chye na nna asak hkrung ra ai. Karai Kasang manu shadan ai hpe chye na nna asak hkrung ai ngu ai gaw Karai a chyeju hpe myit dik let, Karai Kasang sharawng awng ai wa tai hkra asak hkrung ai lam re. Tinang hkum hpe myit n dik ai, nanghpam lu sha ni hte, n se nsa ai hku jahten sharun ai; Karai Kasang n ra ai n tara , mawp lu mawp sha ai hku tsun shaga asak hkrung ai, masha shada lachyen ginhka asak hkrung ai, Karai Kasang hpan da ai mungkan hte mahkri shawn, manu shadan shamyet shanat asa n hkrung ai, rai yawng Karai Kasang shagrau tawn ai hkrang bung sumla a manu hpe jahten shaza ai lam tai na re. Karai Kasang a man hta tinang hkum hpe Hkrang bung sumla hku tsawra manu shadan hkungga ai wa chyu sha hkrangbung sumla a manu sari sadang, ahkang aya, atsam ningja hpring hpring hkrung nga lu ai sha n-ga, tinang a shawng lam asak hkrung lam hpe Karai Kasang a chyeju hte gaw gap nga lu ai re. Num ngu ai mung Karai Kasang a hkrang bung sum la hku hpan da hkrum ai shinggyim masha re. Num gaw la hta grit ai, la ni daram n kaja ai, n hkum tsup ai ngu n mai myit la ai, n mai masat la ai. La ni mung num ni hpe shagrit na ahkang n nga ai. Hpa majaw nga yang “Na chying kaja ai” ngu Karai Kasang masat da, shagrau da, chyeju jaw da ya hkrum ai ni hkrai re. Matut nna mung, hkrang bung sumla a na chying mai kaja ai chyeju hpe num ngu ai shinggyim asak hkrung lam hku hpring hpring tsup tsup hkam la lu na matu Karai Kasang shaman chyeju jaw nga ai re. (2) Hpan shalat ai hte seng ai myit masa ningja lu ladu da lu ai chyeju (the mind of creation) Karai Kasang gaw, hpanda ai wa hku nna, nga yawng dang hta hpe shangai dat ai, shabyin dat ai, nga wa shangun ai wa re. Ningpawt Ninghpang laika hta, “hpa mung n nga ai kaw nna sumsing lamu hte ginding aga hpe hpan da ai. Matut nna mung akrin ayang re ai hte asan awan rai nga ai ginding aga rai nna, Karai a wenyi gaw hka hpung ni a ntsa e hpum nga ai…….” ngu ka da ai lam gaw Karai Kasang gaw byin pru wa shangun ai (Sh) shangai dat ai (sh) nga wa shangu ai hkritung pu jat (womb) re ngu ai hku shinggyim masha ni hpe chye na la shangun nga ai re. Dai hta sha n-ga shangai da ai hpe bau shapan shalat (Nurture) ai re. Ga shadawn – Karai Kasang Israela ni hpe shi a kasha hku shangai la nna bau shapan shalat ai lam ni chyum laika hta rawng nga ai. Nsin hpe n htoi, si ai hpe hkrung ai, n kaja ai hpe kaja wa shangun ai, n tara ai hpe tara wa shangun ai, n dinghpring ai hpe dinghpring wa shangun ai, n sim sa ai hpe sim sa wa shangun ai, kaji kadun nga ai kaw na galu kaba wa chye chyang kung hpan wa shangun ai re. Dai zawn hpan shalat shangai shaprat bau shapan ai shaloi, myit masin hta hkam sha ai lam law law, myit galu ra ai lam law law, hkam sharang ai lam law law, mara raw dat ya ra ai lam law law hpe arang bang ra ai re. Kanu num ni kaw mung dai Karai Kasang zawn shangai shaprat ai hkritung pu jat

(womb) hte bau shapan shalat ai lam hta ra kadawn ai myit masa ningja ni rawng nga ai re. Dai gaw la ni n lu la ai, num ni sha madu la lu ai lak lai ai chyeju rai nga ai. (3) Laklai ai tsawra myit chyeju Karai Kasang a agape tsawra myit ngu ai gaw, shangai shaprat ai ngu ai kanu kawa tsaw ra myit kaw na npawt hpang ai re. Karai Kasang gaw shi hpan tawn da ai shinggyim masha ni hpe tsawra ai. Shi hte nsoi nsa matut nna shaprat da ai kashu kasha ni re majaw manu shadan ai tsawra ai re. Shinggyim masha ni myit nsu shaga n madat tim tsawra ai. Shinggyim masha ni a akyu a matu galaw ya mayu ai. Machyi hkam, asum hkam, ba hkam, jam jau hkam nna ma a matu galaw ya ai tsawra myit gaw n gun ja dik, hkik hkam dik, marai rawng dik, tsawm htap dik ai lam re. Nu num ni mung hkritung ten kaw nna, ma hte nsa matut ai ngu ai mahkrum madup hku chyena la lu ai lam hta, wa la ni hta grau ai chyeju lu la ai re. La ni gaw shinggra tara hku ma gun ai ngu ai n nga ai. Na um na sin byin ai aten kaw nna machyi hkam, asum hkam, ba hkam, jam jau hkam nna ma a matu sak hkrung bau maka ya ai tsaw ra myit; koi gam, hkam sharang, myi prwi hte gat hkai, tinggyeng shagyawm, shakut sharang let ma ni hpe bau maka ai tsawra myit gaw n gun ja dik, hkik hkam dik, marai rawng dik, tsawm htap dik ai tsaw ra myit re. Dai hpe nu num ni gaw tinang nan a mahkrum madup hku hkam sha nna chye na la lu, hkrang shapraw lu ai gaw, Karai a agape tsawra myit hpe gun da lu, shadan dan lu ai lam re majaw laklai ai chyeju re. (4) Sai galai ai hku nna hpan da ai lam ningnan hpe hkam la lu ai chyeju Hpanda ai wa a yaw shada ai lam n chye ai ni gaw, shingra tara, dinghta shinggyim myit machyu nna gaw gap ai htunglai hte lam shagu hpe masat, daw dan chye ai re. Dai hku htai la ai ni gaw, num ni hking hkra sa ai lam nga ai majaw grit ai, yawm ai, n kaja ai, n hkrak ai ngu masat ma ai re. Rai tim Karai hpan da ai shaloi ‘na chying kaja ai’ ngu ai hkum sai shan hte hkrung ai aten e tsun ai re. Dai majaw, kaja ai lam a matu she Karai Kasang hpan da ai lam re. Hking hkra sa, sai galai ai lam gaw, ningnan hpan shalat ai lam re. Grau hkam kaja tsawm htap wa na matu re. Dingsa ni, n hkrak ai lam ni, n kaja ai lam ni galai mat nna grau san seng ai de, grau chyoi pra ai de, grau mai kaja ai de sak hkrung sa wa lu na matu re. Dai gaw Karai Kasang shinggyim masha ni hpe hkam la nga shangun mayu ai sak hkrung lam hpe nu num ni gaw shan hte a ta tut hkum hkrang hta byin nga ai shingra maka mahkrum madup hku chye na hkam sha lu ai chyeju lu la ai ni rai nga ai. Shinggyim masha gaw n hkum tsup ai ra rawng ai ni re majaw ayan myit malai ai hte, Yesu Hkristu hta hpan da ai lam ningnan hpe hkam la lu ra ai, galai shai nga ra ai re. Yubak mara kaw na kashin kamun la ai, jasan jaseng la ai, ningnan bai shabyin la ai ngu ai lam ni gaw shinggyim masha shagu dinghta hkum hkrang si ai shani du hkra hkam la ra ai lam re. Nu num ni a shata shagu hking hkra sa, sai galai ai ai lam gaw “galai shai ra ai ngu ai” Karai kasang a mungga lachyum shapraw htawn tsun dan nga ai lam rai nga ai majaw, laklai ai chyeju rai nga mali ai. Ga Hpungdim Hpanda ai Karai a yaw shada ai lam hpe grau grau chye na wa magang, num ni a prat gaw grit ai, yawm ai, n kaja ai, n hkrak ai n re ngu ai hpe grau grau chye na wa magang rai wa na re. Karai a shingni maka, myit masa ningja, yawshada ai lam ni hpe hpun sumli da ai, hkrang shapraw ya nga lu ai, ginlen shalai jaw ya lu ai asak hkrung lam gaw laklai ai chyeju hkam la nga lu ai asak hkrung lam re. Rai tim num la kadai grau ai ngu ai baw hku lachyum htai la ai baw n rai. Karai Kasang shi hte shi laklai ai chyeju kum hpa jaw da let hkrang bung sumla hku Karai Kasang a hpung shingkang shadan shadawng nga shangun ai ngu ai hpe chyena hkam la lu ai lam she, jaw ang ai hkam la ai lam rai nga na re. Shagrit

hkat ai baw, lachyen ginhka ai baw, dip gamyet shanem da hkat ai baw myit jasat sat lawat ni hkoi mat wa ra ai. “Na chying kaja nga ai” ngu ai shinggyim asak hkrung lam hku yawng hkrang bung sumla a manu sari sadang, ahkang aya, atsam ningja hpring hpring hkrung nga lu ai sha n-ga, tinang a asak hkrung lam hpe Karai Kasang a chyeju hte gaw gap nga lu ai hte shani shagu Karai Kasang a hpung shingkang a matu hkrung nga lu mu ga law. To God Be The Glory!

Ginlen shalai ai,

Rev.Dr. Lahpai Awng Li MIT, Insein. Nhtoi: 30 Oct, 2016.