Ntsa de Nna Shangai Ai Masha

NTSA DE NNA SHANGAI AI MASHA Chyum Daw: Yawhan 3:1 Rai ti mung, Yuda masha ni hta salang rai nga ai Nikodi mying ai Hparishe langai mi nga ai: 2 dai wa gaw shana e Yesu kaw sa nna, Rabai e, nang gaw K.K kaw nna du sa ai sara rai nga ndai hpe, anhte chye ga ai: nang dan ai lamik kimla ni gaw, K.K n lawm yang gaw, kadai mung n galaw lu ai, ngu nna shi hpe tsun wu ai. 3Yesu gaw, ngai nang hpe kaja wa teng teng tsun de ga, Ntsa de nna n shangai ai masha gaw, K.K a mungdan mu lu na n rai, ngu nna shi hpe htan wu ai.:4 Bai Nikodi gaw, masha gaw aprat kaba sa yang, kaning rai bai shangai na a ta? kanu a hkritung de bai shang nna shangai lu na a ni? ngu nna san wu yang,:5Yesu gaw, Ngai nang hpe gaja wa teng teng tsun de ga, Hka hte Wenyi e n shangai ai masha gaw K.K a mungdan hta shang lu na n rai. :6 hkum shan hte shangai ai gaw, hkum shan rai nga ai, Wenyi hte shangai ai chyawm gaw wenyi rai nga ai. Ga Hpaw: Shinggyim hkum shan kaw na shangai ai shinggyim asak krum lam gaw, nawku hutng tara, jep ai tara kade lu shadik tim hkye hkrang la ai chyeju n lu hkam la lu ai. Karai Kasang nga ai hpe chye lu dam tim, htani htana asak n madu la lu ai. Yesu Hkrstu hpe tinang a asak hkrung lam a matu hkye la madu hku hkap la kam sham ai wa chyu sha, hkye hkrang la ai chyeju hkam la lu nna, htani htana asak lu la na re. I. Nawku htung tara shadik ai hte sha gaw sumsing mungdan mu lu na n rai Nikodi gaw Hparishe re. Lu su ai wa re (Yaw 19:39 Nicodi mura hte achyaw kayau ai manam pyaw ai baw, joi sumshi dang la sa nna Yesu a mang hpe chya ya ai).Yuda ni hta salang, Sanhedrin council masha kaba re. Nikodi a lam hpe yu ai shaloi, kaga Hparishe ni hte gaw n bung ai. Yesu madun ai lamik kum la ni gaw Karai Kasang lawm ai majaw galaw lu ai lam re ngu nna, Yesu hpe hkungga ai wa re. Rai tim Yesu hpe hkye la madu hku hkap la kam sham ai wa n re. Nikodi gaw, Yesu hkaw tsun ai mungga ni a majaw, Myit masin kata na n tara ai lam, manang wa lu la na akyu hpe tinang a tinggyeng machyu nna lu la shakut ai lam ni yawng gaw kaman li la rai nga ai hpe chye wu ai. Hparishe ni a nawku htung shadik ai lam, tara shadik ai lam gaw n jaw ai asak hkrung lam rai nga ai; nnan bai galai shai ra ai lam hpe dum ai wa re. Hparishe malawng maga gaw tinang hkum tinang grai dinghpring dum, ma ai. Yesu Hparishe ni hpe daru ai lam gaw, K.K hpe myit masin , kraw lawang, n-gun lagaw ma hkra hte nawku daw jau na malai, nawku htung tara ni hpe she grau ahkyak shatai ai majaw re. Rai tim, Nicodemus, Arimathea Yosep ni gaw grai kaja ai, K.K hpe teng sha hkrit hkungga ai ni rai ma ai. Yesu Hparishe ni hpe daru kau ai lam gaw, K.K hpe myit masin , kraw lawang, n-gun lagaw ma kra hte nawku daw jau na malai, nawku htung tara ni hpe she grau ahkyak shatai ai majaw re. Nikodi hku nna, shana e Yesu hpang de lagyim sa nna, Karai Kasang a mungga tara ni hpe bawng ban ai re. Shi gaw hparishe langai rai nga ai the maren, hparishe tai lu ai, Yuda salang

tai lu ai gaw K.K a chyeju re ngu shakawn ai hte,Yesu mung shi hpe shakawn shagrau ai ga tsun na hpe myit mada ai lam mung mai byin ai. Rai tim Yesu n shakawn shagrau ai sha, lahkawng bai shangai ra ai ngu she sharin shaga wu ai. Dai n rai yang nang sumsing mungdan mu lu n re ngau tsun shadum dat ai re. Dai shaloi shi n chye na mat ai re. Dai majaw “masha gaw apart kaba sa yang, kaning rai bai shangai lu na a ta? Kanu a hkritung de bai shang nna shangai lu na a ni? Ngu nna Yesu hpe bai san ai re. Dai ni mung masha law law wa nawku htung tara, jep ai tara shadik let sumsing mungdan du lu na shadu nga ma ai re. Masha law law wa nawku hpunng a (Buga, Ginwang, Mungdaw, Mungdan madang) ningbaw ningla shara hkan lawm lu ai majaw sumsing mungdan shang lu na re shadu ai re. Masha law law wa chyum laika na lam ni hpe madang tsaw ai hku chye na jang sumsing mungdan shang lu na re ngu shadu ai re. Masha law law wa chyum masa hpaji the seng ai madang tsaw dagree lu jang sumsing mungdan shang lu na re shadu nga ma ai re. Yesu tsun shadum ai lam gaw, ntsa de nna n shangai yang gaw, lahta na lam ni Kaman lila sha re. Karai Kasang Yesu Hkristu hku nna jaw ya ai mara raw dat ya ai chyeju hte, chyoi pra ai Wenyi a hpung shingkang chyeju hta kri dun ai lam rai yang she lahta na lam ni gaw Karai Kasang a mungdan hte seng ai lam rai wa ai ngu tsun sharin da nga ai. II. Yesu Jaw ai hkye hkrang la ai chyeju lu la ra ai Ntsa de na shangai ai(bai shangai ai) npawt kaw nna bai shangai ai, kalang bai shangai ai ngu ai gaw, K.K kaw na shangai ai bai hkam la ra ai ngu ai re. Npawt kaw nna galai shai nna npawt kaw nna bai hpang ai asak hkrung lam re. Masha nnan, myit masin nnan,sat lawat nnan re.Wenyi a galai shai ya ai hte Wenyi a hpung shingkang npu e shangai wa ai lam re. Nikodi dai hpe n chye na ai. dai majaw asak kaba sayang she kanu a hkritung kaw shang nna kalang bai shangai na i? ngu san ai re. Shi chyena ai gaw shinggyim masha ni tara shadik ai, nawku htung hkan shadik ai, chyoi pra shakut ai, dinghpring shakut ai lam hku rai yang Karai Kasang a man e myi man pa na re ngu ai sha re. Yesu gaw, chyoi pra ai, dinghpring ai ngu ai gaw Karai Kasang masat ya yang chyu sha lu la mai ai baw re. Karai Kasang hpe kam sham ai wa chyu sha mail u la ai. Karai Kaang shabyin ya yang chyu sha mai madu la lu ai. Dai majaw Karai Kasang Yesu Hkristu hku nna jaw ai hkye hkrang la ai chyeju hpe kam sham ai the hkam la lu ra ai ngu tsun sharin ai re. Yesu wudang hta jen hkam let shinggyim masha ni hpe jaw ai chyeju gaw yubak mara kaw na raw dat ya ai (pardon) lam rai nna, bai hkrung rawt let shinggyim masha ni hpe jaw ai chyeju gaw daru magam hpung shingkang (power) rai nga ai. Hparishe ni hta byin ai mang hkang madung gaw nawku htung shadik ai, shinggan shingni arung arai , arawng aya, galaw lu ai amu bungli hpe ahkyak da ai. Myit masin galai shai ai lam n nga ai majaw re. Karai Kasang Yesu Hkristu hku nna jaw ai hkye hkrang la ai chyeju hta hta (1) sak hkrung masa nnan (New situation: salvation as objective change): adopted into the family of God; reconciliation to restore the relation with God. (2) Myit masin ningnan (New self:salvation as inner change): new creation in Christ. Christlike through the renewal of one's inner nature by

the Holy Spirit (3) Lai n sam sat lawat ningnan (New steps: Salvation as behavioral change): new way of life. received in faith but expressed in good works, ni byin pru wa shangun ai re. K.K a mungdan de shang lu na matu, K.K kasha tai lu na matu, hte htani/na asak lu la na matu gaw K.K a sharawng awng ai lam hpe hkap la nna, hkan nang hkan sa jang she lu la na re. Ya shanhte (Yuda hte Hparishe ni) a ta tut asak hkrung lam hku gaw n mai byin ai. K.K up hkang galai shai ya yang she byin wa mai ai re. Hkristu sha galai shai ya lu a/ Hkristu hta sha nnan shangai wa lu ai. Anhte a myit masin hta Hkristu shang up hkang ai hpe hkam la nna asak hkrung yang chyu sha ningnan galai shai wa mai ai re. Hka gaw san seng hkra kashin gamun ai kum la, yu bak hpe kashin kau ai, raw dat kau ai kum la hpe tsun ai re. Wenyi gaw hpung shingkang a kum la re. Mara raw dat hkrum ai hte sha n ngut ai, Yesu hte rau mungkan hpe awng dang ai: n tara ai myit masin, kyang lai len ni hpe kau da ai, tengman ding hpring ai, tinggyeng shagyawm nna manang wa a matu asak hkrung ai, K.K a hpung shingkang a matu hkrung ai wa tai wa ra ai. Karai Kasang ahpung shingkang npu hta tut nawng nga mayu ai, Karai sharawng awng ai lam ni hpe grau grau chye na wa lu na matu Chyum laika hti nna madat mara hkan sa mayu ai asak hkrung lam hpe ayan shagroi gara ai lam re. Dai ni anhte a nawku hpung, kun dinghku hte hkumding dek a asak hkrung lam hta kata myit masin shawng san seng ra ai tengman ra ai tara rap ra ra ai. Tinggyeng machyu ai, tara rap ra lam n nga ai rai yang wu wu di di, mahkawn shakawn, wudek nta ni hte ja gum hpraw kade lu tim shaman chyeju n byin ai hpe myit dum ra ai. Yesu gaw dai zawn re ai myit masin rawng ai ni a matu si hkam nna ningnan bai shangai shangun nga ai re. Dai Yesu jaw ya ai chyeju hpe yawng kam sham ai the lu la da ra ai. Shaloi Chyoi pra ai Wenyi a daru magam hpung shingkang lu la na re. Shaloi shinggyim atsam the n lu la lu ai lak lai ai asak hkrung lam lu la na re. Hkrat sum nga ai asak hkrung lam rai yang awng dang ai chyeju hkam la lu na re. Lai wa sai aten nag aw mai gawsha yubak mara yawng kaw na mung lawt lu na re. Htani htana asak a hkik hkam mai kaja dik ai manu, nam chyim ni hpe shani shagu grau grau hkam la lu wan a re. Asak hkrung lam gaw shani shagu Karai Kasang a hpung shingkang hpe shadan shadawng lu ai asak hkrung lam grau grau tai wa lu na re. Kasa Pawlu a asak hkrung lam hpe yu ai shaloi, Yesu Hkristu the hkrum nna kam sham ngut ai hpang, hparishe aten hte shai mat wa ai. Ntsa de na shangai hkrum ai shaloi tinang hkum chyena ai lam ni, myit mang ai lam ni, sat lawat ni yawng shai mat wa. K.K a hpung shingkang shadan shadawng lu ai wa rai wa. Zake mung Yesu the man chyaw hkrum nna kam sham ai shaloi, galai shai mat ai. Sape ni mung dai hte maren sha re. Dai ni anhte mung dai zawn rai wa na re. Ga Hpungdim: Dinghta shigngyim hkum sai shan a lam gaw, yubak lam hkrai re. Karai Kasang hta bai hpan hpajang hkam ai, kam sham ai asak hkrung lam she Karai Kasang a mungdan hte seng ai masha bai tai wa lu ai re. Karai Kasang Yesu Hkristu hku nna jaw ya ai chyeju hkam la lu ngut sai wa chyu sha, yubak a mayam, tsadan a mayam, dinghta myit a mayam

prat kaw nna lawt lu ai hte Karai Kasang a kashu kasha tai wa lu ai re. Dai zawn kam sham ai wa chyu sha n dai prat & htawm hpang prat hte seng ai htani htana asak pahkam hpe lu madu da lu ai wa tai nga lu na ga ai rai! To God Be The Glory! Ginlen shalai ai,

Rev, Dr. Lahpai Awng Li MIT Insein, Yangon. 4 Sept, 2016.